175 ஆண்டுகளாக ராமாயண ஏடு வாசிக்கும் குடும்பம்.
சிவகங்கை மாவட்டம் நெற்குப்பையில் ந.பழ. குடும்பத்தினர் கடந்த 175 ஆண்டுகளாக ராமாயண ஏடு வாசிக்கும் பாரம்பரியத்தை தொடர்ந்து வருகின்றனர்.
சைவம், தமிழை போற்றும் நகரத்தார் சமூகத்தினர், வைணவத்தைப் போற்றும் வகையில் புரட்டாசி மாதத்தில் வீடுகளில் ராமாயண ஏடு வாசிக்கும் வழக்கத்தைக் கடைப்பிடித்து வருகின்றனர். அந்த வகையில் நெற்குப்பை இரணிகோயில் ந.பழ. குடும்பத்தினர் 1850-ம் ஆண்டு முதல் இந்த பாரம்பரியத்தை தொடர்ந்து வருகின்றனர்.
குடும்பத்தைச் சேர்ந்த நல்லகருப்பன் செட்டியாருக்கு ஏற்பட்ட பார்வைக் குறைபாடு நீங்க வேண்டி ராமாயண ஏடு வாசிப்பதாக வேண்டிக்கொண்டதாகவும், பின்னர் பார்வைக் குறைபாடு சரியானதாகவும் கூறப்படுகிறது. இதையடுத்து பனை ஓலையில் ராமாயணத்தை எழுதி, ஆண்டுதோறும் வாசிக்கும் வழக்கம் தொடங்கியது.
ஒவ்வொரு ஆண்டும் புரட்டாசி சனிக்கிழமையில் தொடங்கும் ஏடு வாசிப்பு, அடுத்த சனிக்கிழமையில் நிறைவு பெறுகிறது. பழமையான ஓலைச்சுவடியை பாதுகாக்கும் வகையில், 1980-ல் அதன் உள்ளடக்கம் கையெழுத்துப் பிரதியாக மாற்றப்பட்டு, தற்போது அதையே வாசித்து வருகின்றனர்.
ஆறு தலைமுறைகளாக தொடரும் இந்த பாரம்பரியம், ஒவ்வொரு புரட்டாசியிலும் குடும்பத்தினரிடையே மகிழ்ச்சியையும் ஒற்றுமையையும் ஏற்படுத்துவதாக குடும்பத்தினர் தெரிவித்தனர்.
0
Leave a Reply