25 YEARS OF EXCELLENCE
Weather: -
Friday Nov 06, 2026
05:24:28pm
Weather: -
Friday Nov 06, 2026
05:24:28pm
ராகவ் மிர்தாத் இயக்கத்தில் உருவாகி வரும் பேண்டஸி திரைப்படம் ‘ட்ரோன்ஸ்’. இதில் சித்தி இத்னானி, அஞ்சலி நாயர், தேவதர்ஷினி உள்ளிட்டோர் முக்கிய கதாபாத்திரங்களில் நடித்துள்ளனர்.கனவுகளில் மட்டுமே நிகழக்கூடிய விசித்திரமான சம்பவங்கள் நிஜ உலகில் நடந்தால் எப்படி இருக்கும் என்ற வித்தியாசமான கற்பனையை மையமாக கொண்டு இப்படம் உருவாகி வருகிறது. ஹாரர் மற்றும் பேண்டஸி அம்சங்களுடன் உருவாகும் இப்படத்தின் படப்பிடிப்பு நிறைவடைந்து, இறுதிக்கட்ட பணிகள் நடைபெற்று வருகின்றன.
லண்டனில் நடைபெற்ற கார் ரேஸ் போட்டியில் பங்கேற்ற அஜித் அணியை, போட்டிக்கு முன்பாக தமிழக முதல்வர் விஜய் சந்தித்தார். அப்போது அஜித்தின் ரேஸ் காரின் மினியேச்சர் மாடலை அவருக்கு விஜய் பரிசாக வழங்கினார். அதில், ‘என் அன்பான சகோதரர் அஜித்துக்கு’ எனக் குறிப்பிட்டு, ‘பிரியமுடன் விஜய்’ என ஆட்டோகிராப் செய்திருந்தார். பதிலுக்கு அஜித்தும் தனது ஹெல்மெட்டை விஜய்க்கு பரிசாக வழங்கினார். இருவரும் சந்தித்துக் கொண்ட புகைப்படங்கள் சமூக வலைதளங்களில் வைரலாகி வருகின்றன.இதனிடையே, அஜித்தின் கார் ரேஸ் தொடர்பான ஆவணப்படமான ‘கிளாடியேட்டர்ஸ்’ படத்தில் விஜய் நடிக்கிறாரா என்ற எதிர்பார்ப்பு எழுந்துள்ளது. ஏ.எல். விஜய் இயக்கும் இப்படத்துக்கு ஜி.வி. பிரகாஷ் இசையமைக்கிறார். லண்டன் ரேஸ் போட்டி முடிந்த பிறகு, அஜித் மற்றும் விஜய் இணைந்து எடுத்த புகைப்படத்தைப் பகிர்ந்த ஜி.வி. பிரகாஷ், ‘இரு பெரும் ஆளுமைகளுடன் பணியாற்றியது மகிழ்ச்சி’ எனப் பதிவிட்டிருந்தார். மேலும், ‘கிளாடியேட்டர்ஸ்’ என்ற ஹேஷ்டேக்கையும் பயன்படுத்தியிருந்தார்.அவர் இருவரது படங்களுக்கும் இசையமைத்ததை குறிப்பிட்டாரா அல்லது ‘கிளாடியேட்டர்ஸ்’ படத்தில் இருவரும் இணைந்து பணியாற்றுவதை சுட்டிக்காட்டினாரா என்பது விரைவில் தெரியவரும்.
மாரி செல்வராஜ் இயக்கத்தில் உருவாகி வரும் ‘மஞ்சணத்தி’ திரைப்படத்திற்கு இசையமைக்கிறார் இளையராஜா. தேனியில் நடைபெற்ற படப்பிடிப்பு தொடக்க நிகழ்ச்சியில் கலந்து கொண்டு பேசிய அவர், தனது இசை தொடர்பான அனுபவம் ஒன்றை பகிர்ந்துகொண்டார்.அவர் கூறுகையில், “ஜெர்மனியில் தமிழ் கர்ப்பிணி ஒருவருக்கு வயிற்றில் குழந்தையின் அசைவுகள் நின்றதால், அறுவை சிகிச்சை செய்ய டாக்டர்கள் அறிவுறுத்தியுள்ளனர். அப்போது என் இசையை கேட்கச் செய்துள்ளனர். இரண்டு நாட்கள் கண்காணிப்புக்குப் பிறகு பரிசோதித்தபோது, குழந்தைக்கு உயிர் வந்திருப்பது தெரியவந்தது. இது உண்மை சம்பவம்.இசையமைப்பது என் வேலை. அதைத்தான் சரஸ்வதி எனக்கு கொடுத்திருக்கிறார்” என்றார்.
இந்தியாவின் புகழ்பெற்ற கர்நாடக இசைப் பாடகி மற்றும் பாரத ரத்னா விருது பெற்ற எம்.எஸ். சுப்புலட்சுமியின் வாழ்க்கை திரைப்படமாக உருவாக உள்ளது.இப்படத்தை இயக்குநர் கவுதம் தின்னனூரி இயக்க உள்ளதாக கூறப்படுகிறது.முதலில் எம்.எஸ். சுப்புலட்சுமியின் கதாபாத்திரத்தில் நடிக்க சாய் பல்லவி மற்றும் ருக்மணி வசந்த் ஆகியோரிடம் பேச்சுவார்த்தை நடைபெற்றதாகவும், சில காரணங்களால் அந்த வாய்ப்பு அவர்களுக்கு அமையவில்லை என்றும் தகவல் வெளியாகியுள்ளது.தற்போது இந்த முக்கிய கதாபாத்திரத்தில் ராஷ்மிகா மந்தனா நடிக்க இருப்பதாக சினிமா வட்டாரங்களில் தகவல் பரவி வருகிறது.எம்.எஸ். சுப்புலட்சுமியின் பிறந்தநாள் செப்டம்பர் 16 என்பதால், அதே நாளில் இப்படம் குறித்த அதிகாரப்பூர்வ அறிவிப்பு வெளியாகலாம் என எதிர்பார்க்கப்படுகிறது.
ராமையா ரவிச்சந்திரன் இயக்கத்தில் உருவாகியுள்ள படம் ‘யானை மரம்’. இதில் மாஸ்டர் அபினேஷ் முதன்மை கதாபாத்திரத்தில் நடித்துள்ளார்.பழங்குடியின கிராமத்தைச் சேர்ந்த சிறுவனுக்கு சமூகத்தில் உரிய அங்கீகாரம் கிடைத்ததா என்பதையும், அந்த சிறுவனுக்கும் யானை மரத்திற்கும் இடையேயான நட்பையும் இப்படம் பேசுகிறது. இதுவரை 16 நாடுகளில் திரையிடப்பட்டுள்ள இப்படம், 20 சர்வதேச விருதுகளையும் வென்றுள்ளது.
இந்தாண்டில் கடந்த வாரம் வரை தமிழில் சுமார் 150 படங்கள் வெளியாகியுள்ளன. அவற்றில் சில படங்கள் மட்டுமே வெற்றி பெற்றுள்ளன. இந்த வாரம், செப்டம்பர் 10-ம் தேதி கார்த்தி நடிக்கும் ‘சர்தார் 2’, சூரியின் ‘மண்டாடி’மற்றும் அருள்நிதியின் ‘டிமாண்டி காலனி 3’ ஆகிய படங்கள் வெளியாக உள்ளன. இதில் ‘டிமாண்டி காலனி 3’ திரைப்படத்தின் ரிலீஸ் தேதி தள்ளிப்போக வாய்ப்புள்ளதாக கூறப்படுகிறது. அதற்குப் பதிலாக ஒன்று அல்லது இரண்டு சிறு பட்ஜெட் படங்கள் வெளியாகலாம்.
மலையாள திரையுலகில் இளம் முன்னணி நடிகராக வளர்ந்து வருபவர் ஆண்டனி வர்கீஸ். சமீபத்திய பேட்டியில் தனது தவறவிட்ட வாய்ப்பு குறித்து அவர் மனம் திறந்துள்ளார்.“விஜயின் ‘மாஸ்டர்’ படத்தில் அர்ஜுன் தாஸ் நடித்த கதாபாத்திரத்தில் நடிக்க முதலில் எனக்குத்தான் வாய்ப்பு வந்தது. அந்த நேரத்தில் சில படங்களில் நடிக்க ஒப்புக்கொண்டிருந்ததால், அந்த வாய்ப்பை ஏற்க முடியவில்லை. விஜய் சார் இப்போது முதல்வராகிவிட்டார். இனிமேல் அவருடன் இணைந்து நடிக்கும் வாய்ப்பு கிடைப்பது சந்தேகம்தான். அந்த வாய்ப்பை தவறவிட்ட வருத்தம் இப்போதும் அதிகமாக இருக்கிறது” என்று அவர் தெரிவித்துள்ளார்.
தேசிய விருது பெற்ற நடிகர் எம்.எஸ். பாஸ்கர் கதை நாயகனாக நடிக்கும் புதிய படம் ‘விடியும் காத்திரு’. இப்படத்தை அரவிந்தராஜன் இயக்குகிறார்.படம் குறித்து இயக்குனர் கூறுகையில், “ஒரு கொலை நடந்த வீட்டிற்குள் விசாரணைக்காக செல்லும் இரண்டு காவல் அதிகாரிகளுக்கு, அங்கு நிகழும் அமானுஷ்ய சம்பவங்களால் ஏற்படும் பிரச்னைகள்தான் கதை. இதில் காவல்துறை அதிகாரியாக எம்.எஸ். பாஸ்கர் நடிக்கிறார்” என்றார்.
திரையுலகில் 50-வது ஆண்டில் பயணித்து வரும் இசையமைப்பாளர் இளையராஜா, தற்போதும் பல படங்களுக்கு இசையமைத்து வருகிறார். நடிகர் ராமராஜன் கதாநாயகனாக நடிக்கும் ‘கடவுள் தந்த பரிசு’ படத்திற்கும் அவர் இசையமைக்கிறார். இளையராஜா - ராமராஜன் கூட்டணியில் உருவாகும் 25-வது படம் இது.காசிமாயன் இயக்கும் இப்படத்தில் செந்தில், கோவை சரளா ஆகியோர் நீண்ட இடைவெளிக்குப் பிறகு ராமராஜனுடன் இணைந்து நடிக்கின்றனர்.
நடிகர் அஜித் கார் பந்தயத்தில் தீவிரமாக ஈடுபட்டு வருகிறார். இங்கிலாந்தில் நடைபெறும் ‘மிச்செலின் லீ மான்ஸ் கோப்பை’ கார் பந்தயத்தில் அஜித்தும், அவரது அணியும் பங்கேற்கின்றனர்.தமிழக முதல்வர் விஜய், தொழில் முதலீடுகளை ஈர்ப்பதற்காக செப்டம்பர் 10 முதல் 16-ம் தேதி வரை லண்டன் செல்ல உள்ளார். அப்போது தனது ஓய்வு நேரத்தில் செப்டம்பர் 11 மற்றும் 12-ம் தேதிகளில் நடைபெறும் கார் பந்தயத்தை முதல்வர் விஜய் நேரில் சென்று பார்க்கலாம் என்றும், அஜித்தை சந்திக்க வாய்ப்புள்ளதாகவும் தகவல்கள் வெளியாகியுள்ளன.
